Djatu di Louvor pa Dia di Erois Nasional

10 Petalas Ki ta Boia-nu
(pa louva Kabu Verdi i ses Erois)


Skritu pa Marsianu nha Ida Padri Nikulau Ferera Kulaborador di FORCV i Mestri na ikonumia pa Universidadi di Wyoming, Merka


Es fla-m bo e restu
lama dedus nhor Deus
na meiu di Atlantiku spadjadu
frutu sakudidela
na fin di trabadju

Es fla-m bu ka ten apelidu
pa ba ta npalia
vizinhu nprista-bu di sel
dja ten tantus sekulu
ki di bo dja bu skese ranja
konfortadu ku nomi trokoladu

Es fla-m Deus di Ventu
ku Kes Otu makumunadu
na sul di Djabraba ta ragatxa
txuba pa ta tadja
di beija-bu manenti

Es fla-m txeu di nos rais
fuliadu li kontra vontadi
na sekulus butuperiu
skapa pa unha gatu
di noitis sen katxupa
sen rezervas i sen ramus
nen mons amigu

Es fla-m un monti kusas
sabi i ka sabi
dretu i tortu
tudu na kurason es baza-m

Es fla-m bo ke di nos
kunpadru ku suor i sangi
dor i speransa
i ku ponta txopu
sustedu pa nos Erois

N subi na seu
N odja Europa i Afrika
N dixi na txon
N anda Amerika i Azia
N ka kapri bu sodadi
N dizisti di Kanguru i Konpanhia
ka bale pena mas andansas
nha kurason e so pa bo
10 petalas ki ta boia-nu

Marsianu nha Ida padri Nikulau Ferera